29/08/11

Gr 77

Erau (34) Aude (11)

Trauchada actuala : Blaia-Liborna

"Las dròllas dei Lonzac l'an large e l'an long

L'an large e l'an long las dròllas de la montanha…"

Borréia de chas nos, jogada au violon per Leon Peirat de Sent Salvador (19)

       Vese per lo prumier cop de las vinhas aigadas au goton per goton (avem ben un eschaufadis qu'arriba). D'un costat de la rota, los jòunes plants son eisserbats a la trancha e de l'autre costat asaigats de pesticidas (I beg your pardon : "Produchs fitòsanitaris") dins la sega dau formatge de las vachas antibioticadas mai lo vin qu'es bon per la santat, çò ditz.

       Lo lavador d'Asilhanet es en eschalier : de janoelhs sus lo d'en bas per petelar lo linçòu saulhat puei de mai en mai naut per achabar d'eissurir lo mai pròpe. An ben rason de los conservar ; aquò pòt servir un jorn avenidor de manca d'energia…

Fijas culhidas ben maduras e segur tastadas, lo pè ! Mas las olivas verdas sus l'aubre son amaras e coma se disiá lo meu paire, los estrangiers toristas pensavan que l'i aviá daus oliviers per las olivas verdas e d'autres per las negras (quò es pas completament faus ; afar de varietats). 

 

canal-pre-olonzac

Lo brave canau de las doas mars es un pauc monoton, mas força plasent per marendar a l'ombra, a la broa de l'aiga.

 

       Aquí, trauche Lonzac (Olonzac) qu'en Corresa avem Lo Lonzac e sas filhas famosas. Tot en arribar a Lonzac, pense que Lo Lonzac era lo país dau Grand de la Martina de Lille, filha dau Delord (De l'òrt) ben conegut e mentor d'un jove enarque a la debuta, vengut president fai gaire, après un  corresian de mai, Chirac. Se'n carrem ben en Corresa.

       Passe a La Retòrta sus una mòda d'esclausadis en peira , un eschampador per regular l'aiga dau canau. La retòrta es lo plais torsat defensiu qu'en lemosin es tanben una corona de pan torçuda.

epanchoir4

Tot doçetament, me'n vene de la Montanha Centrala vers las Pireneus, lai-lonh…

Ivon

Camping "La Pineda" a Lesinhan