Quatrena estapa : Chambon - Evaus

Dimècres lo 16/9/09

La Cruesa (23)

9H30

GR 41

“E, subran, dins la tor ressona una cridada

qui monta e qui redola en una espofetada

- e la garda, entendent las estranhas clamors,

acort e veu en plors

la dama a l’unicorn teissuda en la tentura

qui met dau jorn levant a la muralha escura.”

P L Granier dins “ La dama a l’unicorn”

Un pauc de plueja mas, tot parier,

“Plueja dau matin aplanta pas lo pelegrin”

Avant de partir, cerche l’ostau de Pau Lois Granier emb a la man la foto publiada dins “Lemouzi”. 

Tornevire un pauc dins lo borg mas una dama me ditz qu’aquela maison era après lo pont roman sus la Voaisa.

A ! es aqui ! es gaire chamnhada.

Una placa en francés nonmàs : “Le grand poète de la Combraille…” e sus lo seu ostau nadiu de la plaça, l’i a pas de placa.

La gent d’aquí son pas fiers de l’enfant occitan dau país.

Dins lo cafè, quò platussa nonmàs en francés mas l’i ai auvit dire “je suis été a l’hôpital”.

Una pausa dins la basilica avant de trotar per lo GR vers Evaus.

Bona odor, bon eime, bona chalor mai tanben bon resson.

L’i chante lo “Rei gloriós”.

Me siete per me pausar e migrar. Un òme entra e me demanda en s’escusar, se pòt jugar dau saxo ; a l’encontrari, aquò m’agrada.

Es vengut au marchat vendre de miau e ne’n profita per far d’improvisacions emb son bois dins l’abàdia.

Ieu, sosche au prince otoman Gem gardat en Lemosin au secle XV a Borganuòu (e a la Vaufrancha ?) per lo comandor Gui de Blanchefort.

Los talhiers d’ Aubusson an benleu fach la tapissariá de “la Dama a l’Unicòrn” per la botar dins sa gàbia per assuausar lo preisonier ; “Amb que’s desport e’s don solaç”.

Pau Loís Granier faguet un libreton de poëmas sus las amors meravilhosas o imaginàrias entra la Dama e Gem, fraire faidit de Bajazet.

Mas a la despartida de Gem vers Roma la domna es a purar…

E ieu tanben m'en vau.

“Viatz ! sus ! a Evaus !”

Ivon