Estapa 15 : Egleisa Nòva d’Entraiga – Condat – Abadia de Fenier

Divendres lo 11/06/10

Pueg de Dòma (63) - Cantal (15)

Egleisa Nòva d’Entraiga – Condat – Abàdia de Fenier

GR 4

    Ai, ai ! dins la còsta de Condat a vèlo, quò es ma prumièra crebason e jos la pluèia que tomba a plenas selhas.

Cerche lo cròs de la chambra d’aer en riba de la Ruá .

    Pas de pluèia sus lo GR mas un vent frejador. En sautar dau Pueg de Dòma (òsca per las marcas rojas e blanchas ben plaçadas dins aqueu despartament) e en laissar lo GR 30 tròbe deguna indicacion sus la sanha.

    Amb la bossòla mai la carta me’n vau tròp au ponent e davale sus lo borg de Montbodife que l’ i nasquet lo president Pompidor que disiá :

« il n’y a pas de place pour les langues et cultures régionales dans une France destinée à marquer l’Europe de son sceau »

Ai pas una pensada esmoguda per aqueu renegat, conhat dins son musèu barrat.

    En davalar vers Condat, legisse una plancarda risolenta :

 « Le Veisset, première route à gauche » per anar chas Marisson, una petiòta ostalariá. Quò me fai pensar au monde de Corresa que se fan sonar « Vécé » o « Sale » pusleu que « Vaisset » o « Salès » prononciats a l’occitana.

    Arribe au camping per reservar l’emplaçament puei achabe la pujada a l’Estanh daus Monges e a l’Abàdia de Fenier. Los Cistercians desveloperon lo malhum idrologic coma a Òbasina qu’a sa chanau daus monges per alimentar l’Abàdia e lo seu vivier.  

    Me’n vau far « Som som… »  dins la robiera de la Ruá. Pas gaire de monde ; nonmàs tanben tres tendetas pincadas d’Anglés a vèlo.

A deman !

Ivon