Estapa 12 : Estanh de Servièra – Estanh de Guerin – La Borbola

Dijòus lo 27/05/10

Pueg de Doma (63)

GR 441 - 30

     Doas suspresas per començar : lo campatge municipau de La Borbola es barrat ; se ditz qu’es trop prep de Dordonha e que l’i a d’aigatges nombrós.

    Mai ! per mon arma ! ai oblidat mas chauçaduras de marcha. En passar a vèlo au Mont Dòra me’n crompe de novelas perque « un grand Brun amb de las chaussaduras negras de vila » sus los suquets enneviats, seriá un pauc ridicule.

     Dins la pujada a vèlo vers l’estanh de Garin,

las limaças negras trauchan la rota dins una version de la rotleta russa ; las esbolhadas seràn minjadas per las futuras esbolhadas ; un tròç de vitas de limaçons auvernhats. 

    Tòrne prener lo GR a l’Estanh de Serviera . Degun ! manca un peschador endurmit. Quò es lo « Maar nòstrum » per ieu solet.

     Sus lo tuquet vese a man drecha lo Pueg de Doma ennivolat e a man mança dins son cròs, Orcival.

Ai una pensada per Mercuri,

lo Dieu dau viatjaires dins son temple amont-naut e Nostra Dama dau Ligams dins sa chapela que nos desliurarà per poder partir.

     Au marende ai una brava vusda desgajada vers l’Ubac que me permet de tornar pensar a ma chaminada dempuei la debuta a Bossac. M’assiete dins los airelhiers mas ailàs ! quo es pas la saison dau glanatge.

     De la rota vesem la Rocha Tuilhera (per las lausas de teulada, coma çò ditz la plancarda o puslèu per causa que la lava fai daus tudeus) e la Rocha Sònadoira (fonòlite que sòna çò ditz H. Pourrat)

A l’estanh de Garin m’endralhe vers lo Sanci e lo Plom dau Chantau.

     Me lance sus lo plateu desgajat sus las pradelas belas amb de las jonquilhas e lo vent que bufa coma dins lo filme daus violonaires. En arribar vers la fin de l’etapa ai una vusda remirabla sus La Borbola e lo Mont Dòra, tots pitits a costat de Dordonha.

Tròbe urosament un « camping » per pincar la tenda.

Bona nuech ! ( quau bocan que fai Dordonha !)

Ivon

Tecnica :

- a l’Estanh de Serviera prener l’oriera dau bòsc de drecha d’aiciá la pujada.

- a l’Estanh de Garin, passar sus la retenguda e montar sus lo plateu.

- chau pas mancar lo GR per davalar sus La Borbota.