Estapa 35 : Valarauga - Serra de la Luseta - Lo Vigan - Avesa

09/05/11

Gard (30)

GR : 62C - 60 - 60A - 7

"Li nivo iron si coumpagno

E li roucas si paiòu

Quand, i calo di mountagno

Dins lou païs Cevenòu

Cambo lèsto, closco duro

Pèd de ferre, man seguro

De la valengo à l'auturo

Se bendavon li Raiòu."

André Chamson - "Li nivo iron si coumpagno"

     Au despart de Vilarauga, a l'Ofici dau torisme quò es mau indicat e en luòc

  de prener lo GR 62C prene lo PR rosseu qu'es força pendut per pujar vers lo suc de La Luseta que mena vers lo Vigan. Torne trobar lo GR mai naut (que chau contunhar sus la rota de l'Aigoal per s'endralhar sus lo bon GR).

            Quò es una montada penosa e pentosa... me chau passar de 450 a 1250 metres au Còl de la Bareta . Me pause de temps en temps en visar l'immensitat dau paisatge e la mendror umana dins la valada.  Me'n chau sonhar lo mau per lo mau e per mai alenar deve bufar fortament. Laidonc, façiá  a la valada lançe "Quand lo pastor vai deslargar", una chançon anciana dau grope "Los del Sauvaterra". Benleu que m'an auvit a Vilarauga mai sus lo Mont Aigoal, a l'observatori. Un tropeu d'ovelhas blanchas e quauquas negras fujisson a mon arribada. Vese pas de pastre que lo tropeu es en autogestion a minjar la bruja. Apres un "Aitau tondem la lana d'aqueus blancs moltons" en lor onor, marende a 1000 m dins un bosquet de pinher. Un faucon giscla e se'n vai tornar trobar son amija vers lo Còl del Pas ont ere aier ; quala libertat miladieus !

Au Còl de la Luseta arribe a la tomba d'Andre Chamson e de la soa femna. Curios ! Es escrich "Andre Chamson de l'Academie française, Lelette née Lucie Mazaurie ; 1900- 1983". Era tanben Majorau dau felibritge mas l'i es pas marcat. Nonmas es escrich "Résister"; Chau resistar tanben contra l'aboliment de la nòstra lenga, los Cevenòus !

       Arribe au punt lo mai naut puei es la davalada sus Lo Vigan. Ai agut mestier de mos 2 litres d'aiga que sus aquel bocin de Trauchada, l'i a pas d'aiga  dau tot. Trauche Lo Vigan vers lo sud e lo Chasteu d'Assas per trobar lo GR 7 en riba de l'Arre que segue d'aicia Avesa. Quau plaser aquela aiga que riala après lo manca d'aiga amont-naut.

Quò es un tresaur d'aparar contra los trolhaires rapiares.

Ivon