Estapa 36 : Avesa - Montdardier - Vissec
Gard (30)
GR : 7 - rota
"Serpatejar (v. intr.) : èsser sinuos, -osa;
Un dralhòl que serpateja per la montanha
Una ribièira que serpateja per una plana"
Cantalausa - Diccionari General Occitan
La Vis a pas d'aiga, nonmas de las gravas blanchas ; l'aiga es dejos. Lo paisatge es minerau, ablandat per lo solelh. En VTC dins la gòrja de la Vis, en pujar vers Alson, vese una colobra sus la rota a se chaufar suauda e pas tant lonh tanben una vipera, un mulòt dins la gòrja a lo digerir . Laisse las serps dins lor vida d'estatjans d'aqueu pais. Mas mefi ! de temps en temps aqui, plòu a selhas que la rota ne'n es barrada.
Laidonc partisse d'Avesa en prener lo GR apres lo molin (de segre lo PR rosseu per un moment) per montar sus lo platèu dau Larsac. Arribe, dins la vegetacion secha dau plateu, a Montdardier, son chasteu neògotic e son egleisa pitiòta ; lo timpan es escultat de simbòus esoterics coma la crotz basca dins lo sens contrari de las aguilhas d'una mòstra, pas coma la svastika nasi dins lo sens negatiu.
L'i a un punt d'aiga ( n'i a un tanben a Vissec) e un banchon assolombrat . Òsca! per las municipalitats que pensan aus randonaires.
Puei quò es lo sendareu dau plateu amb de las plancardas "atencion aus braus". Per lo moment aquò se passa ben.
Passe rasis la pairada de Blandas qu'era un centre d'extraccion de la peira per la litografia.Lo litografe dau Museu d'Ussel me disia que las etiquetas de botelhas de vin eran fachas per litografia (mai amb l'òffset, an conservat a la debuta la disposicion litografica) e quò es possible de recuperar aquelas peiras dins las cavas dau Bordeu.
A Blandas prene la rota per davalar vers Vissec. Lo cirque de Navacella au lonh e la gòrja de la Vis balha un biais de Canhon dau Colorado. Sus un panneu explicatiu, lese " Bausor (?) vient du mot occitan: Falaise rocheuse". An oblidat de dire que la ressorgida de la Vis que furnit l'aiga a Vissec, nommat "Las Foux", ven de l'occitan "Las fonts". En generau los microtoponimes occitans son pas mes en valor sus aqueus panneus.
- Lo Campatge municipau dau Vigan, "Val de l'Arre", es ben plasent.
Ivon