Estapa 49 : Velheus – Menèrba – Lo Puech
11/08/11
GR 77
Erau (34)
-"La gorja que vesetz nasquet de las forças erosivas de las aigas de Brian
La ribièra entalhèt lo calcari apelat "calcari a alveolinas".
-"The canyon that you can see is a result of the erosive force of the waters of the Brian. The river cut into the alveoli limestone."
-"Le canyon qui s'offre à vous est issu des forces érosives du Brian.
La rivière a entaillé le calcaire dit "à alvéolines".
Paneu trilenga (per chausir sas lunetas ;) sus "la Vita de Brian" (the Brian, le Brian) a Menèrba.
En passar dins lo borg de Velheus minje dòas fijas que pendolhan costat rota ; maduras e fòrças bonas puei, enlai, una autra fija pas tan bona ; quò es una Caprifigier masle (plan merces a internet per las informacions que las flors son dins la fija e ben complicada la fecondacion).
Passe razi un parcatge especiau per lo monde que davalan lo GR d'aiciá Menèrba ; indicacion que la solesa es achabada.
Serpenteje dins las Gòrjas dau Brian que ne'n chau pas aver la virason amon-naut. Passe lo pont medeviau qu'eschamba lo Brian mai las alveolinas per veire Menèrba sus son piton rochelos. De las peira gentas mai coloradas me balha l'enveja de far una crotz perlada de gravas. Per la seguda, tagarai la Trauchada, de crotz de peiras o traçadas sus las parets.
De lonh me semble de veire una gleisòta dins lo fond mas qu'es nonmas un Transformator (lo catolicisme mai l'electricitat se ditz ;) arribe coma los pelegrins bonòmes per la ròca enauçada (que lo "warning" a la sautada de Menerba fai faute per entresenhar los toristas mai lors mainats dau dangier de li trotar). Menerba (celte : men, erb) es ben lo pais dau ròc.
A costa de l'escultura amb l'auseu, l'i a un paneu escriu nonmas en frances, sus los 150 catars cramats per los Frances. En visar la barbaria daus envaïdors, ilhs podian ben pensar que Satan era lo mestra de nòstre monde.
Après una cervesa freja (dau bon Dieu :), dins un brave estanquet asolombrat, puje sus lo Puech davant de davalar vers la valada audenca.
Lo ser per achabat la setmana me pague un bon sopar defòra a Sant Pons a costat d'Olandès que son a migrar sus los noms daus plats regionaus. Per la digestion, en tornar au campatge dels Ciriers, me fau una permenada magica a la serena dins la ciutat vielha. A la font de Jaur, trobe una serada populari de concert marende de jaz. Un moment fòra temps.
Ivon